दाङ :लुम्बिनी प्रदेश सरकारमा हालै नियुक्त भएका पाँच जना मन्त्रीले आज पद तथा गोपनीयताको शपथ लिएका छन् । प्रदेश प्रमुख कृष्णबहादुर घर्तीले नवनियुक्त मन्त्रीहरूलाई शपथ गराएका हुन् । मुख्यमन्त्री चेतनारायण आचार्य नेतृत्वको मन्त्रिपरिषद् पुनर्गठनपछि एमालेबाट चार जना र जनता समाजवादी पार्टी (जसपा) बाट एक जना मन्त्री सरकारमा सहभागी भएका छन् ।
पुनर्गठित मन्त्रिपरिषद् अनुसार एमालेका तुलसीप्रसाद चौधरीलाई कृषि, भूमि व्यवस्था तथा सहकारी मन्त्रालयको जिम्मेवारी दिइएको छ । त्यसैगरी रामजीप्रसाद घिमिरेले स्वास्थ्य मन्त्रालय, रत्नबहादुर खत्रीले भौतिक पूर्वाधार विकास मन्त्रालय तथा डिल्लीराज भुसालले ऊर्जा, जलस्रोत तथा सिँचाइ मन्त्रालयको नेतृत्व सम्हाल्ने भएका छन् । यस्तै, जसपाका भण्डारीलाल अहिरलाई आन्तरिक मामिला तथा कानुन मन्त्रालयको जिम्मेवारी प्रदान गरिएको छ ।
मुख्यमन्त्री आचार्यले केही दिन अघि नै नयाँ मन्त्रीहरूको नियुक्तिका लागि सिफारिस गरेका थिए । तर, प्रदेश प्रमुख प्रदेश बाहिर रहेकाले शपथ ग्रहण कार्यक्रम तत्काल हुन नसकेको र आज औपचारिक रूपमा सम्पन्न गरिएको जनाइएको छ ।
मन्त्रिपरिषद् पुनर्गठनसँगै लुम्बिनी प्रदेश सरकारले विकास निर्माण, सेवा प्रवाह र प्रशासनिक कामलाई थप प्रभावकारी बनाउने अपेक्षा गरिएको छ ।
