कोहलपुर, बाँके: कोहलपुर उद्योग वाणिज्य संघको पहलमा एक दिने निःशुल्क स्वास्थ्य शिविर सफलतापूर्वक सम्पन्न भएको छ ।शिविरबाट १०८ जना स्थानीयले स्वास्थ्य परीक्षण सेवा लिएका छन्।
मौसम परिवर्तनसँगै बढ्दो स्वास्थ्य समस्यालाई लक्षित गर्दै आयोजना गरिएको शिविरमा आँखा, नाक, कान तथा घाँटीसम्बन्धी परीक्षणलाई प्राथमिकता दिइएको थियो। सहभागीहरूलाई विशेषज्ञ चिकित्सकबाट प्रत्यक्ष जाँच गरिनुका साथै आवश्यक परामर्श र निःशुल्क औषधि समेत वितरण गरिएको आयोजकले जनाएको छ।
नेपालगञ्ज मेडिकल कलेज शिक्षण अस्पताल, कोहलपुरको प्राविधिक सहयोगमा सञ्चालन भएको शिविरमा अनुभवी चिकित्सकहरूको टोली खटिएको थियो। परीक्षणका क्रममा धेरैजसो सेवाग्राहीमा आँखा र कानसम्बन्धी समस्या देखिएको चिकित्सकहरूले बताएका छन्, जुन मौसम परिवर्तनसँग सम्बन्धित रहेको उनीहरूको निष्कर्ष छ।
संघका अध्यक्ष प्रदीप भट्टराईका अनुसार जटिल समस्या भएका बिरामीहरूलाई थप उपचारका लागि सहुलियत दरमा सेवा उपलब्ध गराउने व्यवस्था मिलाइएको छ। उनले यस्ता कार्यक्रमले समुदायमा स्वास्थ्यप्रति सचेतना बढाउनुका साथै समयमै रोग पहिचान गर्न महत्वपूर्ण भूमिका खेल्ने विश्वास व्यक्त गरे।
सामाजिक उत्तरदायित्वअन्तर्गत आयोजना गरिएको शिविरले विशेषगरी आर्थिक अवस्था कमजोर भएका नागरिकलाई राहत दिएको स्थानीयवासीहरूको भनाइ छ। निःशुल्क रूपमा विशेषज्ञ सेवा र औषधि पाउँदा आफूहरू लाभान्वित भएको उनीहरूले बताएका छन्।
आयोजकका अनुसार यस्ता स्वास्थ्य शिविरहरूले नियमित जाँच नगर्ने तथा अस्पतालसम्म सहज पहुँच नपुगेका नागरिकलाई स्वास्थ्य सेवाको दायरामा ल्याउन सहयोग पुग्ने गरेको छ। आगामी दिनमा यस्ता कार्यक्रमलाई अझ प्रभावकारी र व्यापक बनाउँदै लैजाने योजना संघले बनाएको जनाएको छ।
