नेपालगञ्ज : नेपालगञ्ज उपमहानगरपालिका वडा नम्बर १२ कोरियनपुरमा गएराति एक अज्ञात महिलाको जलेको अवस्थामा शव फेला परेको छ । स्थानीयवासीका अनुसार घटनास्थलमा महिलालाई जिउँदै आगो लगाइएको आशंका गरिएको छ । विभिन्न सामाजिक सञ्जालमा ६–७ जनाको समूहले महिलामाथि आगजनी गरेको दाबी समेत गरिएको छ, तर यसबारे आधिकारिक पुष्टि भने भइसकेको छैन ।
प्रहरीका अनुसार प्रारम्भिक अनुसन्धानमा महिलाको जलेर मृत्यु भएको देखिए पनि उनलाई कसले र किन जलायो भन्ने विषय अझै खुल्न सकेको छैन । घटनाको प्रकृति शंकास्पद देखिएकाले अनुसन्धानलाई तीव्र पारिएको बाँके प्रहरीले जनाएको छ । शवलाई पोस्टमार्टमका लागि पठाइएको छ भने मृतकको पहिचान खुलाउने प्रयास जारी रहेको छ । घटनाबारे थप विवरण आउन बाँकी छ ।
समाचार अपडेट युवतिको पहिचान खुल्यो
नेपालगञ्जमा मध्यराती जलेको अवस्थामा सडकमा मृत फेला परेकी युवतीको सनाखत भएको छ ।
गएराति बाँकेको नेपालगंज उपमहानगरपालिका–१२ कोरियनपुरमा जलेको अवस्थामा सडकमा मृत भेटिएकी युवती सोही स्थानकी २२ वर्षीया सृजना बुढा रहेको खुलेको हो। बुढाका आफन्तहरु अस्पताल पुगेर मृतकको सनाखत गरेको प्रहरीले जनाएको छ ।
बाँके प्रहरी प्रमुख प्रहरी उपरीक्षक अंगुर जीसीका अनुसार मृतकले २ दिन अगाडी मात्र आफुलाई कुटपिट भएको भन्दै एकजना युवक विरुद्ध उजुरी दिएपछि प्रहरीले पक्राउ गरेकोमा मृतक बुढाकै आग्रहमा मिलापत्र गरेर प्रहरीले छाडेको थियो । घटनास्थलमा सलाई र आगलागी हुने पदार्थको गन्ध आएको प्रहरी उपरीक्षक जीसीले बताए ।
प्रारम्भीक अनुसन्धानमा मृतक बुढाले यसअघि नै एक पुरुषसँग बिबाह गरि उनीबाट एक सन्तान समेत जन्मदिएर पछि सम्बन्ध बिच्छेद गरेर बसेको खुलेको प्रहरीले जनाएको छ । प्रहरी स्रोतका अनुसार मृतक बुढा केही महिना पहिले नेपालगञ्जको न्यूरोड स्थित एक होटलमा छापा मार्नेक्रममा प्रहरी नियन्त्रणमा समेत परेकी थिइन् ।
पछिल्लो समय बढा नेपालगञ्ज रानीतलाउ नजिकका एक युवकसँग लिभिङ टुगेदरमा बस्दै आएको पनि खेलेको एसपी जीसीले बताए । घटनाबारे आत्महत्या तथा कर्तब्यज्यान अभियोगमा थप अनुसन्धान भइरहेको उनले जानकारी दिए । घटनाको शुक्ष्म अनुसन्धान भइरहेको भन्दै लिभिङ टुगेदरमा रहेका र कुटपिट अभियोगमा पक्राउ परेर छाडिएका पुरुषको नाम भने उनले खुलाएनन् ।
