कोहलपुर, बाँके: बाँकेको कोहलपुरमा एक युवक मृत अवस्थामा फेला परेका छन्। बैजनाथ गाउँपालिका–५ निवासी २७ वर्षीय टिकाराम थापा आइतबार बिहान कोहलपुर नगरपालिका–१५ चन्नहवास्थित खेतको डिलमा मृत अवस्थामा फेला परेका हुन्।
इलाका प्रहरी कार्यालय कोहलपुरका प्रमुख डिएसपी चक्र डम्मर पालका अनुसार स्थानीयवासीले खेतको डिलमा एक युवक मृत अवस्थामा रहेको सूचना दिएपछि प्रहरी टोली घटनास्थल पुगेको थियो। घटनास्थलमा पुगेको प्रहरी टोलीले मृतकको पहिचान टिकाराम थापाको रूपमा गरेको जनाएको छ।
प्रहरीका अनुसार थापा रोजगारीको सिलसिलामा केही समयअघि भारत गएका थिए। उनी शनिबार मात्रै घर फर्किएको प्रारम्भिक अनुसन्धानबाट खुलेको छ। घर फर्किएको एक दिन नबित्दै उनको शव फेला परेपछि घटनाले स्थानीय क्षेत्रमा चासो र चर्चा बढाएको छ।
प्रारम्भिक अनुसन्धानका क्रममा मृतकको शरीरमा बाहिरी रूपमा कुनै चोटपटक वा हिंसात्मक आक्रमणका संकेत नदेखिएको प्रहरीले जनाएको छ। यद्यपि घटनास्थलबाट लागुऔषध सेवनसँग सम्बन्धित केही सामग्री तथा प्रमाणहरू फेला परेको डिएसपी पालले जानकारी दिए।
प्रहरीको प्रारम्भिक अनुमानअनुसार लागुऔषधको अत्यधिक मात्रा (ओभरडोज) सेवनका कारण मृत्यु भएको हुन सक्ने आशंका गरिएको छ। यद्यपि मृत्युको वास्तविक कारण भने पोस्टमार्टम रिपोर्ट आएपछि मात्रै स्पष्ट हुने प्रहरीको भनाइ छ। मृतकको शव परीक्षणका लागि भेरी अस्पताल, नेपालगञ्ज पठाइएको छ। पोस्टमार्टम रिपोर्ट प्राप्त भएपछि घटनाबारे थप यथार्थ खुल्ने अपेक्षा गरिएको छ।
यता मृतकका परिवारजनले भने घटनालाई शंकास्पद भन्दै कर्तव्य ज्यानसम्बन्धी मुद्दा दर्ता गराएका छन्। हालसम्म कसैविरुद्ध किटानी जाहेरी भने नदिइएको प्रहरीले जनाएको छ।
घटनाको प्रकृति, मृत्युअघि थापाको गतिविधि तथा सम्भावित कारणबारे विभिन्न कोणबाट अनुसन्धान भइरहेको इलाका प्रहरी कार्यालय कोहलपुरले जनाएको छ। प्रहरीले पोस्टमार्टम रिपोर्ट, घटनास्थलबाट सङ्कलित प्रमाण तथा सम्बन्धित व्यक्तिहरूसँगको सोधपुछका आधारमा थप अनुसन्धान अघि बढाएको छ।
